Գրադարան

Գիշերային անմիզապահությունը մեծ տարիքի երեխաների մոտ

Գիշերային անմիզապահությունը մեծ տարիքի երեխաների մոտ

Time Read 2 րոպե

Մինչև 6 տարեկան երեխաների մոտ գիշերային անմիզապահությունը կամ գիշերամիզությունը բավականին տարածված երևույթ է:

Այնուամենայնիվ, ավելի մեծ տարիքի երեխաները նույնպես կարող են թրջել անկողինը: Եթե ձեր երեխայի 6 տարեկանը լրացել է և նրա գիշերային անմիզապահությունը շարունակվում է, կան բաներ, որոնք ձեռնարկելով դուք կարող եք օգնել ձեր երեխային, որ նա գիշերներն անցկացնի չոր:

Ի՞նչ է գիշերային անմիզապահությունը

Գիշերային անմիզապահությունը կամ գիշերամիզությունը տեղի է ունենում, երբ ձեր երեխան միզելու կարիք առաջանալիս չի կարողանում գիշերային քնից արթնանալ: Այն կարող է կրկնվել յուրաքանչյուր գիշեր կամ ավելի հազվադեպ: Բժիշկները գիշերային անմիզապահությանը նաև անվանում են նոկտուրա:

Որոշ երեխաների մոտ գիշերամիզությունը կարող է լինել ի ծնե, իսկ մյուսների մոտ ի հայտ գալ ավելի ուշ տարիքում:

Գիշերային անմիզապահությունը կարող է լինել խիստ հիասթափեցնող ինչպես երեխայի, այնպես էլ ծնողների համար: Սակայն դրա պատճառը ձեր անհաջողությունը կամ սխալը չէ, և գիշերամիզությունը ձեր դաստիարակության կամ երեխայի վարքի հետ որևէ ընդհանուր բան չունի:

Պատճառներ

Որոշ երեխաներ քնում են շատ խորը և չեն կարողանում արթնանալ, երբ առաջանում է միզելու կարիք: Այլ դեպքերում երեխան կարող է ունենալ իր տարիքից ավելի փոքր միզապարկ: Կամ գիշերային ժամերին կարող է արտադրվել համեմատաբար մեծ քանակությամբ մեզ:

Խիստ հազվադեպ երեխաների մոտ գիշերամիզության պատճառ կարող է հանդիսանալ հակադիուրետիկ հորմոն անվանումն ունեցող հորմոնի ցածր մակարդակը, որի պատճառով գիշերային ժամերին արտադրվող մեզի ծավալները մեծանում են և միզապարկը չի կարողանում պահել ավելցուկային մեզը:

Գիշերամիզության առաջացման մեջ դեր ունի նաև ժառանգական գործոնը, և եթե նրա ծնողների կամ նրանցից մեկնումեկի մանկական տարիքում գրանցվել է գիշերամիզություն, երեխաների մոտ նույն վիճակի հավանականությունը բարձրանում է:

Երեխաների գիշերամիզության մեջ նշանակություն ունեն նաև հուզական գործոնները, օրինակ՝ սթրեսային միջադեպ կամ վախ:

Խիստ հազվադեպ երեխաների մոտ գիշերային անմիզապահության պատճառ կարող են հանդիսանալ ֆիզիկական խնդիրները:

Եթե անհանգստացած եք ձեր երեխայի մոտ գիշերամիզության շարունակությամբ կամ ձեր երեխան խիստ հիասթափված է նման վիճակից, դիմեք նրա բժշկին:

Ախտորոշում

Բժիշկը կզննի ձեր երեխային և կտա հարցեր՝ կապված նրա նախկին և ներկա առողջական վիճակի հետ: Նա նաև կարող է հետաքրքրվել ձեր և մյուս ծնողի առողջությամբ:

Երբեմն բժիշկը կարող է խորհուրդ տալ որոշ հետազոտություններ, որոնք դեպքերի մեծ մասի ժամանակ որևէ խնդրի առկայություն չեն նախանշում: Սակայն, բժիշկին այդ հետազոտությունների պատասխանները պետք են, որ ժխտի այլ, ավելի լուրջ առողջական խնդիրների առկայությունը:

Ոչ հազվադեպ կարիք է զգացվում նաև ներգրավել այլ մասնագետներին, օրինակ՝ հոգեթերապևտ, մանկաբույժ, նյարդաբան և այլն:

Բուժում

Կան գիշերային անմիզապահությամբ մեծ տարիքով երեխաներին օգնող մի շարք միջոցառումներ:

  • Մի՛ պատժեք կամ մի՛ ծաղրեք երեխային, եթե նա միզել է գիշերային քնի ընթացքում:
  • Հոգ տարեք, որ օրվա ընթացքում երեխան ստանա բավարար քանակով հեղուկներ, սակայն անկողին մտնելուց առաջ սահմանափակեք հեղուկների, այդ թվում՝ գազավորված և կոֆեին պարունակող ըմպելիքների օգտագործումը:
  • Եղե՛ք համբերատար, երեխային հասկացող և քաջալերող: Դուք կարող եք երեխային ներգրավել իր իսկ խնդրի հաղթահարման գործընթացին, օրինակ՝ երկուսով լվանալ թաց գիշերանոցը կամ անկողնային սպիտակեղենը:

Ժամանակի ընթացքում գիշերամիզությունը սովորաբար անհետանում է, իսկ եթե, այնուամենայնիվ, շարունակվում է ավելի բարձր տարիքում, զրուցեք նրա բժշկի հետ և հետևեք նրա խորհուրդներին:

Իմացե՛ք ավելին գիշերային անմիզապահության մասին։

Հոդվածը տեղադրվել է՝ 26-04-2019 վերանայվել է՝ 27-03-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով