Գրադարան

Խոլեսթերինի և լիպիդների թեստ

Խոլեսթերինի և լիպիդների թեստ

Time Read 5 րոպե

Արյան լիպիդների (խոլեսթերինի ֆրակցիաների) թեստի նպատակը խոլեսթերինի տարբեր տեսակների մակարդակները չափումն է։

Այս թեստը թույլ է տալիս գնահատել, թե ինչ չափով եք ենթարկվում սրտային հիվանդությունների և ինսուլտի ռիսկին։ Խոլեսթերինի և դրա ֆրակցիաների լաբորատոր թեստերին այլ կերպ անվանում են արյան լիպիդների կամ լիպիդային պրոֆիլի թեստ։

Ի՞նչն են հետազոտում

Արյան լիպիդային պրոֆիլը ներառում է հետևյալ չորս ցուցանիշները՝

  • ընհանուր խոլսեթերին (քոլեսթերին, խոլեսթերոլ)
  • բարձր խտության լիպոպրոտեիդների (ԲԽԼ) խոլեսթերին, որին այլ կերպ անվանում են լավ խոլեսթերին
  • ցածր խտության լիպոպրոտեիդների (ՑԽԼ) խոլեսթերին, որին այլ կերպ անվանում են վատ խոլեսթերին
  • տրիգլիցերիդներ։

Լիպիդները և խոլեսթերինը արյան ճարպանման նյութերն են, որոնց որոշ տեսակներ անհրաժեշտ են օրգանիզմի նորմալ կենսագործունեության համար։ Այնուամենայնիվ, եթե ձեզ մոտ հայտնաբերվել է ՑԽԼ-խոլեսթերինի կամ տրիգլիցերիդների բարձր մակարդակ կամ ԲԽԼ-խոլեսթերինի ցածր մակարդակ, ուրեմն ձեզ մոտ սրտանոթային հիվանդությունների զարգացման հավանականությունը մեծ է։

Ինչո՞ւ է այս թեստը նշանակվում

Այս անալիզներն օգտակար են, եթե բժիշկը ցանկանում է գնահատել ձեզ մոտ սրտանոթային հիվանդությունների ռիսկը։ Սովորաբար արյան լիպիդների թեստը խորհուրդ է տրվում 45 տարեկանն անց մարդկանց և նրանց, ովքեր ունեն բարձր արյան ճնշում (հիպերտենզիա) կամ շաքարային դիաբետ (շաքարախտ)։

Եթե ձեզ մոտ արդեն ախտորոշվել է սրտային հիվանդություն կամ նախկին հետազոտություններով ստացվել են խոլեսթերինի և տրիգլիցերիդների բարձր մակարդակներ, դուք ամենայն հավանականությամբ պետք է պարբերաբար կրկնեք այս թեստը, որ հսկեք խոլեսթերինի ֆրակցիաների մակարդակները։ Խոլեսթերինի և լիպիդների մակարդակները նվազեցնելիս զգալիորեն կրճատվում է նաև սրտամկանի ինֆարկտի ռիսկը։

Ինչպե՞ս նախապատրաստվել այս թեստին

Լաբորատորիա պետք է ներկայանալ առավոտյան, քաղցած վիճակում։ Սա նշանակում է, որ դուք պետք է վերջին անգամ սնունդ ընդունած լինեք արյունը հանձնելուց առնվազն 9-12 ժամ առաջ (այս ընթացքում կարելի է ջուր խմել): Եթե դեղեր եք ընդունում, անպայման այդ մասին տեղեկացրեք ձեր բժշկին։

Ձեր արդյունքների մեկնաբանումը

Ընդհանուր խոլեսթերինի, ԲԽԼ- և ՑԽԼ-խոլեսթերինների ու տրիգլիցերիդների մակարդակներն իմանալն ինքնին կարևոր է, սակայն այդ ցուցանիշները պետք է մեկնաբանվեն սրտանոթային մյուս ռիսկի գործոնների հետ միասին, ինչպիսիք են տարիքը, արյան շաքարը կամ արյան ճնշումը։ Սա նշանակում է, որ ձեր թեստի արդյունքները պետք է քննարկել ձեր բժշկի հետ:

Մարդկանց տարբեր խմբերի համար մշակվել են խոլեսթերինի թիրախային մակարդակների վերաբերյալ հատուկ ուղեցույցներ։ «Թիրախային» ասելով պետք է նկատի ունենալ ընդհանուր խոլեսթերինի և դրա առանձին տեսակների այն մակարդակները, որոնց ցանկանալի է հասնել ապրելակերպի, սննդակարգի կամ բուժման միջոցով։ Զրուցեք այս մասին ձեր բժշկի հետ։

Եթե ձեր ԲԽԼ-խոլեսթերինի մակարդակը ցածր է, իսկ ՑԽԼ-խոլեսթրինինը՝ բարձր, ձեր բժիշկը հավանաբար կզրուցի ձեզ հետ այն մասին, թե ինչ ուղիներով կարելի է շտկել դրանք այնպես, որ կրճատվի սրտանոթային հիվանդությունների ռիսկը։ Այսպես, ձեզ կարող է առաջարկվել՝

  • թողնել ծխելը՝ եթե ծխող եք
  • պահել մարմնի քաշը նորմալ՝ առողջ միջակայքում
  • պակասեցնել ալկոհոլի և կերակրի աղի ընդունումը
  • հնարավորինս հաճախ և օրական առնվազն 30 րոպե զբաղվել ֆիզիկական վարժանքներով կամ օրվա ընթացքում լինել ֆիզիկապես ակտիվ։

Ընդհանուր և ՑԽԼ խոլեսթերինների շատ բարձր ցուցանիշների դեպքում բժիշկը կարող է նշանակել խոլեսթերինի մակարդակը նվազեցնող դեղամիջոցներ։ Եթե արդեն օգտագործում եք նման միջոցներ, պետք է պարբերաբար հսկել այս ցուցանիշները։

Իմացե՛ք ավելին խոլեսթերինի մակարդակի նորմալացման մեթոդների մասին:

Լրացուցիչ տեղեկատվություն

Խոլեսթերինի ֆրակցիաների թեստի մասին

Այցելեք մեր կայքի Մեդեքս-Lab բաժինը, որ իմանաք խոլեսթերինի և լիպոպրոտեիդների թեստի և առանձին ցուցանիշների մասին ավելի մանրակրկիտ տեղեկություններ։

Արյան թեստերի մասին

Կարդացեք Մեդեքս-Health բաժնի արյան թեստերի ուղեցույցը, որպեսզի ընդհանուր տեղեկություններ իմանաք արյան թեստերի մասին, այդ թվում՝

  • ինչի՞ մասին հոգ տանել մինչև լաբորատորիա այցելելը
  • ի՞նչ է տեղի ունենում արյան հետազոտության ընթացքում
  • ինչպիսի՞ ճշգրություն ունեն հետազոտության արդյունքները։

Հոդվածը տեղադրվել է՝ 13-04-2018 վերանայվել է՝ 13-03-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով