Վաղ դաշտանադադար -

Եթե դաշտանադադարը (մենոպաուզա, կլիմաքս) սկսկվում է ավելի վաղ, քան ակնկալված մոտավոր տարիքում, կոչվում է վաղ կամ վաղաժամ դաշտանադադար:

Վաղ դաշտանադադարը կարող է ի հայտ գալ բնականորեն կամ որպես որոշ բուժումների կողմնակի ազդեցություն: Կանանց մեծ մասի մոտ դաշտանադադարը սկսվում է 45-55 տարեկանում: Եթե ձեր տարիքը 45-ից ցածր է և զգում եք, որ ձեր դաշտանները սկսել են հազվադեպանալ կամ ընդհանրապես բացակայել, զրուցեք ձեր բժշկի հետ:

Վաղ դաշտանադադարի պատճառները

Ձվարանները դադարում են գործել

Վաղ դաշտանադադարը կարող է բնականոն կերպով առաջանալ, եթե կնոջ ձվարանները դադարում են արտադրել որոշ իգական սեռական հորմոններ, այդ թվում՝ էստրոգեն:

Սա երբեմն կոչվում է վաղաժամ կամ առաջնային ձվարանային անբավարարություն:

Վաղաժամ ձվարանային անբավարարության պատճառը հաճախ հայտնի չէ, սակայն որոշ կանանց մոտ կարող է առաջանալ հետևյալ դեպքերում՝

• քրոմոսոմային արատներ, օրինակ՝ Տերների համախտանիշով կանայք
• որևէ աուտոիմուն հիվանդություն, երբ իմունային համակարգը սկսում է վնասել սեփական հյուսվածքները, այդ թվում՝ ձվարանները
• խիստ հազվադեպ՝ որոշ վարակներ, այդ թվում՝ տուբերկուլոզ, մալարիա և խոզուկ:

Վաղաժամ ձվարանային անբավարարությունը երբեմն ունի ժառանգական բնույթ: Նման դեպքերում կնոջ դաշտանը կարող է դադարել խիստ վաղ տարիքում՝ 20-30 տարեկանում:

Քաղցկեղի բուժումներ

Ճառագայթային թերապիան և քիմիոթերապիան կարող են առաջացնել վաղաժամ ձվարանային անբավարարություն: Սա կարող է լինել մշտական կամ ժամանակավոր:

Վաղ դաշտանադադար զարգանալու ռիսկը կարող է կախված լինել հետևյալ գործոններից:

• Տարիք. սեռահասունացման չհասած աաղջիկները կարող են ավելի հեշտ տանել բուժումները, քան ավելի մեծ տարիքով կանայք:
• Բուժման տեսակ. քիմիոթերապիայի տարբեր տեսակներ կարող են ձվարանների վրա ազդել տարբեր ձևով:
• Ճառագայթային թերապիա. վաղաժամ դաշտանադադարի ռիսկն ավելի բարձր է, երբ ճառագայթների փունջն ուղղվում է դեպի ձեր գլխուղեղ կամ փոքր կոնք:

Ձվարանների հեռացման վիրահատություն

Երկու ձվարանների վիրահատական հեռացումը նույնպես կբերի վաղ դաշտանադադարի:

Օրինակ, ձվարանների հեռացում կարող է նախատեսվել հիստերէկտոմիայի՝ արգանդի հեռացման վիրահատության ժամանա:

Վաղ դաշտանադադարի ախտանիշները

Վաղ դաշտանադադարի հիմնական ախտանիշը դաշտանների կտրուկ հազվադեպացումն է կամ լրիվ դադարումն առանց որևէ այլ պատճառի, ինչպիսին է հղիությունը:

Որոշ կանանց մոտ կարող են ի հայտ գալ նաև տիպիկ դաշտանադադարի այլ նշաններ, այդ թվում՝

• ջերմահորդանքնե՝ հանկարծահաս ներքին տաքության զգացողություն դեմքի, պարանոցի և կրծքավանդակի շրջանում
• գիշերային քրտնոտություն
• հեշտոցի չորություն և սեռական հարաբերության ընթացքում անհարմարավետություն (դիսկոմֆորտ)
• քնելու դժվարություն (անքնություն)
• տրամադրության անկում (դեպրեսիա) կամ անհանգստություն և տագնապ
• սեռական ցանկության (լիբիդոյի) նվազում
• հիշողության և ուշադրության կենտրոնացման խնդիրներ:

Վաղ դաշտանադադարով կանանց մոտ էստրոգենի ցածր մակարդակի հետ կապված բարձրանում է օստեոպորոզի և սրտանոթային հիվանդությունների ռիսկը:

Վաղ դաշտանադադարի ախտորոշումը

Բժիշկը կարող է ախտորոշել վաղ դաշտանադադարը՝ ելնելով ձեր ընտանեկան պատմությունից, գանգատներից և հորմոնների մակարդակը որոշող արյան թեստի արդյունքներից:

Նա կարող է նաև ձեզ ուղեգրել այլ մասնագետների խորհրդատվության (գինեկոլոգ, էնդոկրինոլոգ և այլն):

Վաղ դաշտանադադարի բուժումը

Վաղ դաշտանադադարի բուժման հիմնական մեթոդը համակցված հակաբեղմնավորիչ հաբերն են կամ հորմոնային փոխարինող բուժումը, որոնց նպատակը ձեր բնական չբավարարող հորմոններն արհեստականներով լրացնելն է կամ փոխարինելը։

Ձեր բժիշկը հավանաբար խորհուրդ կտա ընդունել այս բուժումը երկարատև ժամանակի ընթացքում՝ մինչև ձեր բնական դաշտանադադարի տարիքը (մոտավորապես 52 տարեկան) և դրանից հետո, որը ձեզ կտա տևական պաշտպանություն:

Եթե ունեք քաղցկեղի որոշ տեսակներ, օրինակ՝ կրծքագեղձի քաղցկեղ, դուք չեք կարող ստանալ հորմոնային բուժում:

Բժիշկը նաև կխոսի ձեզ հետ և խորհուրդ կտա բուժման այլ տարբերակներ և ապրելակերպի փոփոխություններ, որոնք կարող են նպաստել ձեր ընդհանուր առողջության պահպանմանը: