Գրադարան

Արգանդի լորձաթաղանթի (էնդոմետրիալ) քաղցկեղ

Արգանդի լորձաթաղանթի (էնդոմետրիալ) քաղցկեղ

Time Read 2 րոպե

Արգանդի լորձաթաղանթի կամ էնդոմետրիալ քաղցկեղը չարորակ նորագոյացության տեսակ է, որն աճում է արգանդի ներքին՝ լորձաթաղանթային շերտում:

Վաղ հայտնաբերելիս այս քաղցկեղը հաճախ բուժելի է:

Ի՞նչ է էնդոմետրիալ քաղցկեղը

Էնդոմետրիալ քաղցկեղը զարգանում է, երբ արգանդի լորձաթաղանթում սկսում են աճել ձևափոխված և քաղցկեղայինի փոխակերպված բջիջներ: Որոշ երկրներում սա ամենահաճախ հանդիպող գինեկոլոգիական քաղցկեղն է:

Ռիսկի գործոններ

Էնդոմետրիալ քաղցկեղի զարգացման նկատմամբ ձեր ռիսկը բարձրանում է, եթե՝

  • գեր եք, հատկապես, եթե ունեք նաև շաքարային դիաբետ և բարձր արյան ճնշում
  • ունեք պոլիկիստոզային ձվարանների համախտանիշ
  • ունեք կրծքագեղձի քաղցկեղ, որի կապակցությամբ բուժվում եք Տամոքսիֆենով
  • բուժվում եք էստրոգենով՝ առանց ստանալու պրոգեստին
  • ձեր ընտանիքից ինչ-որ մեկն ունի էնդոմետրիալ, ձվարանի կամ հաստ աղիքի քաղցկեղ
  • երբևէ հղի չեք եղել:

Էնդոմետրիալ քաղցկեղն ավելի հաճախ է հանդիպում մեծ տարիքով կանանց շրջանում, ովքեր անցել են դաշտանադադարի փուլը, թեև երիտասարդ կանայք նույնպես կարող են հիվանդանալ:

Էնդոմետրիալ քաղցկեղի ախտանիշները

Էնդոմետրիալ քաղցկեղի նշաններից են՝

  • հեշտոցային արյունահոսություն, որը ձեր դաշտանը չէ
  • անսովոր հեշտոցային արտադրուկ
  • դժվարամիզություն կամ ցավոտ միզարձակում (դիզուրիա)
  • ցավեր սեռական հարաբերության ժամանակ
  • ցավեր կոնքահատակի (շեքի) շրջանում:

Բոլոր այս ախտանիշները տարածված են և, եթե դրանք ձեզ մոտ առկա են, դեռ չի նշանակում, որ ունեք էնդոմետրիալ քաղցկեղ: Սակայն, եթե անհանգստանում եք կամ գանգատները չեն անհետանում, դիմեք ձեր բժշկին: Կարևոր է հատկապես Տամոքսիֆենով բուժման ժամանակ արտասովոր հեշտոցային արյունահոսություն ունենալիս առանց ուշացնելու բժշկին դիմելը, կամ, եթե նման բան նկատում եք դաշտանադադարից հետո:

Էնդոմետրիալ քաղցկեղի ախտորոշումը

Եթե ձեր բժիշկը կասկածում է, որ կարող եք ունենալ էնդոմետրիալ քաղցկեղ, ձեզ կառաջարկի մի շարք հետազոտություններ, առաջին հերթին՝ արգանդի գերձայնային հետազոտություն, որ ստուգի արգանդի լորձաթաղանթի՝ էնդոմետրիումի վիճակը), արյան և մեզի թեստեր:

Եթե այս հետազոտություններով բժիշկը հայտնաբերեց որոշ շեղումներ, կարող է առաջարկել հիստերոսկոպիա և բիոպսիա: Հիստերոսկոպիան հատուկ գործիքով ձեր արգանդը ներսից դիտելն է, որի ժամանակ կարող է վերցնել և լաբորատորիա ուղարկել էնդոմետրիումի փոքր հյուսվածք:

Բժիշկը կարող է ձեզ նշանակել նաև այլ հետազոտություններ՝ համակարգչային տոմոգրաֆիա (ԿՏ), մագնիսա-ռեզոնանսային տոմոգրաֆիա (ՄՌՏ) կամ պոզիտրոնային էմիսիոն տոմոգրաֆիա (ՊԷՏ):

Էնդոմետրիալ քաղցկեղի բուժումը

Էնդոմետրիալ քաղցկեղով բազմաթիվ կանայք արգանդի, վզիկի, փողերի կամ ձվարանների, երբեմն նաև՝ հարակից ավշային գեղձերի հեռացման վիրահատության կարիք ունեն, որը թույլ է տալիս որոշակի երաշխիք ունենալ, որ քաղցկեղն այլևս չի տարածվի:

Վիրահատությունից հետո ձեզ կարող են առաջարկել նաև ճառագայթային թերապիա, քիմիոթերապիա կամ հորմոնային թերապիա, որ կրճատվի քաղցկեղի կրկնվելու հավանականությունը:

Եթե դեռ չեք հասել ձեր դաշտանադադարի տարիքին և չունեք երեխաներ, խոսեք ձեր բժշկի հետ այն մասին, թե ինչ կարելի է անել, որ ապագայում երեխա ունենաք:

Էնդոմետրիալ քաղցկեղի կանխարգելումը

Առողջ մարմնի քաշ պահպանելը և կանոնավոր վարժանքները կարող են նվազեցնել էնդոմետրիալ քաղցկեղի ռիսկը: Հղիությունը և կրծքով կերակրումը նույնպես կարող են նվազեցնել այս քաղցկեղի հավանականությունը: Եթե ընդունում եք հակաբեղմնավորիչ հաբեր, խորհրդակցեք ձեր բժշկի հետ, թե ինչպես անցնել համակցված հաբերի:

Հոդվածը տեղադրվել է՝ 30-05-2020 վերանայվել է՝ 05-07-2023 | Հիմնական աղբյուր՝ Evidence-Based Overviews

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը: