Գլխացավերը հաճախ կարող են կապված լինել հղիությանն ուղեկցող հորմոնային տեղաշարժերի հետ:
Ապագա մայրերը կարող են նշել գլխացավերի հաճախականության ավելացում կամ նվազում: Հղիության ուշ փուլերում անբացատրելի և հաճախ անհանգստացող գլխացավերը կարող են կապված լինել մեկ այլ լուրջ վիճակի՝ պրեէկլամպսիայի հետ: Ուստի, եթե ձեզ մոտ հղիության երրորդ եռամսյակում (տրիմեստր) առաջացել են գլխացավեր, անպայման այցելեք ձեր բժշկին:
Հղիության ընթացքում գլխացավի պատճառները
Բազմաթիվ կանայք հղիության ընթացքում, հատկապես առաջին և երրորդ եռամսյակներում նշում են գլխացավեր: Եթե հղի եք, կարող եք նշել գլխացավերի հաճախացում հղիության մոտ 9-րդ շաբաթականից սկսած։
Հորմոնային տեղաշարժերից բացի, հղիության վաղ փուլերում ի հայտ եկած գլխացավերը կարող են հանդիսանալ հղիության վաղ նշաններից մեկը, որի հիմքում ընկած է ձեր օրգանիզմի կողմից արտադրվող արյան ծավալի մեծացումը:
Հղիության ընթացքում գլխացավերի այլ պատճառներից կարող են լինել՝
- վատ քուն
- սուրճի, թեյի կամ կոֆեին պարունակող այլ ըմպելիքներից կտրուկ հրաժարում (կոֆեինից զրկանք)
- ցածր արյան շաքար (հիպոգլիկեմիա)
- ջրազրկում (դեհիդրատացիա)
- սթրես
- կեցվածքի կամ մարմնակառուցվածքի շեղում, հատկապես հղիության ուշ փուլերում
- դեպրեսիա կամ անհանգստություն:
Միգրեն
Միգրենը գլխացավի առանձնահատուկ տեսակ է, որը սովորաբար տեղակայվում է գլխի մի կեսում: Գլխացավի ուժգնությունը կարող է լինել չափավորից մինչև անտանելի սասատիկ: Միգրենով մարդիկ նաև նշում են սրտխառնոց կամ փսխումներ, ինչպես նաև լույսի և ձայնի նկատմամբ գերզգայունություն:
Հղիության պայմաններում միգրենը կարող է առաջին մի քանի ամիսներին սաստկանալ, սակայն ավելի ուշ շրջաններում բազմաթիվ կանանց մոտ գանգատները մեղմանում են, որը կապում են էստրոգեն հորմոնի մակարդակի կայունացման հետ: Այլ կանայք կարող են միգրենի ընթացքի մեջ որևէ փոփոխություն չնշել: Որոշ կանանց մոտ տարբեր հղիությունների ժամանակ միգրենի ընթացքը կարող է լինել տարբեր:
Բուժում
Հղի կանանց խորհուրդ չի տրվում օգտագործել միգրենի դեղեր: Գլխացավի մյուս տեսակների դեպքում նաև ցանկալի է, որ հղի կանայք հնարավորինս խուսափեն դեղամիջոցներ ընդունելուց և փորձեն գանգատները մեղմացնել այլ՝ ոչ դեղորայքային մեթոդներով:
Օրինակ, դուք կարող եք՝
- կարգավորել ձեր քունը, ավելի շատ հանգստանալ կամ թուլանալ (ռելաքսացիա)
- փորձել յոգա կամ այլ վարժանքներ
- հատկապես հղիության ուշ շրջաններում սովորել և կիրառել իրանի ճիշտ կեցվածք պահելու հմտությունները
- սնվել կանոնավոր և սննդակարգը դարձնել առողջ
- հարքթային ծոցերից պատճառված ցավերի դեպքում (սինուսային գլխացավեր) փորձել աչքերի և քթի շրջանի տաք միջոցներ (տաք սրբիչ)
- լարվածության գլխացավի դեպքում փորձել պարանոցի հետին մասի սառը միջոցներ (սառցե պարկ)
- պարանոցի և ուսերի մերսում:
Միգրեն ունեցող հղի կանայք նաև կարող են խուսափել այնպիսի գործոններից, որոնք նպաստում են գլխացավերի առաջացմանը կամ ուժգնացմանը: Միգրենի գլխացավեր հրահրող գործոններից են (տրիգերներ)՝
- շոկոլադ
- յոգուրտ և մածուն
- գետնանուշ (արախիս)
- հաց
- թթվասեր
- պահածոյացված միս
- հնեցված պանիր
- գլուտամատի մոնոսոդիում (MSG)
- կոֆեին (զրկանք)
- ուժեղ կամ առկայծող (թարթող) լույսեր
- սուր հոտեր
- սուր ձայներ կամ ուժեղ աղմուկ
- համակարգչի, պլանշետի, հեռուստացույցի էկրան կամ կինոէկրան
- ֆիզիկական ծանրաբեռնվածություն
- հուզական գործոններ, օրինակ՝ վիճաբանություն կամ սթրես:
Եթե դուք միգրենի կամ գլխացավի դեմ ստանում եք որևէ դեղամիջոց, քննարկեք ձեր նշանակումները բժշկի հետ: Ացետամինոֆենը (Պարացետամոլ, Թայլենոլ և այլն)՝ կոդեինով կամ առանց դրա, ընդհանուր առմամբ, համարվում է հղի կանանց համար անվտանգ դեղ, սակայն պետք է խուսափել այլ ցավազրկողներից, ինչպիսիք են Ասպիրինը կամ Իբուպրոֆենը:
Ե՞րբ դիմել բժշկին
Եթե ձեզ մոտ առկա են հաճախակի գլխացավեր, որոնք Ացետամինոֆենով չեն անհետանում, չի բացառվում, որ այդ գանգատը կարող է լինել ավելի լուրջ առողջական խնդրի՝ պրեէկլամպսիայի ախտանիշներից մեկը: Այս վիճակը սովորաբար ընթանում է բարձր արյան ճնշմամբ և երիկամների գործունեության խանգարմամբ: Պրեէկլամպսիան հաճախ զարգանում է հղիության երկրորդ կեսում:
Կապ հաստատեք ձեր բժշկի հետ, եթե գլխացավերից բացի ունեք կողերից ներքև տեղակայված ցավեր, այրոցք, նկատում եք դեմքի, ձեռքերի կամ ոտքերի անսպասելի այտուցվածություն կամ տեսողության հետ կապված խնդիրներ:
Հոդվածը հրապարակվել է՝ 25-04-2020
Վերջին վերանայում՝ 23-04-2024