Ոտքի ցավ -

Ոտքի ցավը կարելի է նկարագրել որպես որևէ ցավի կամ անհարմարավետության զգացում (դիսկոմֆորտ), որը տեղակայված է՝ սկսած ձեր աճուկից մինչև ոտնաթաթ:

Կախված պատճառից, ոտքի կամ ստորին վերջույթի ցավը կարող է լինել չափավորից մինչև սասատիկ ուժգնության, իսկ ախտանիշները՝ շարունակական (անդադար) կամ ընդմիջվող (սկսվող և անհետացող):

Ցավերը, թմրածության և ուղեկցող այլ զգացումները կարող են ընդգրկել ինչպես մեկ, այնպես էլ զույգ ոտքերը: Դրանց մեծ մասն ինքնուրույն անհետանում է, այլ դեպքերում անհրաժեշտ է բժշկական օգնություն, որոշ դեպքերում՝ երկարատև բուժում:

Ախտանիշներ

Ցավը որևէ վնասվածքի կամ հիվանդության ամենահաճախ հանդիպող ախտանիշներից է: Նույն կերպ, ստորին վերջույթը ներառող հիվանդությունները սովորաբար ուղեկցվում են թույլից մինչև սաստիկ ցավերով:

Ոտքի ցավը կարող է ուղեկցվել հետևյալ գանգատներով կամ ախտանիշներով՝

• այտուցվածություն կամ ուռածություն
• երակների լայնացում (վարիկոզ երակներ)
• վերքեր կամ խոցեր
• մաշկային երևույթներ՝ կարմրություն, այտուցվածություն, տեղային տաքություն և այլ նշաններ:

Կարևոր է նաև, թե արդյոք ձեր ախտանիշները ներառում են մեկ, թե երկու ոտքերը և արդյոք երկու ոտքերում առկա գանգատները և նշանները նույնն են, թե տարբերվում են:

Բոլոր դեպքերում, վերոնշյալ և այլ հարցերի ամենաճիշտ պատասխանը կարող է տալ ձեր բժիշկը կամ նրա ուղեգրմամբ՝ մեկ այլ մասնագետ (օրինակ՝ մաշկաբան, անոթաբան, վիրաբույժ, վնասվածքաբան):

Ե՞րբ դիմել բժշկին

Առանց հետաձգելու դիմեք ձեր բժշկին, եթե ոտքի ցավերն ուղեկցվում են այս նշաններով՝

• ձեր գանգատներն աստիճանաբար սաստկանում են
• ի հայտ են գալիս նոր գանգատներ ու նշաններ
• խիստ անհանգստացած եք առկա ախտանիշներից
• ունեք որևէ լուրջ քրոնիկ հիվանդություն:

Պատճառներ

Կան ոտքի շրջանում ցավերի առաջացման բազմաթիվ պատճառներ, որոնցից են՝

• ոտքի շրջանում փոքր վնասվածք, օրինակ՝ հարված, երկարատև ճնշում և այլն
• ոտքերի երկրատև և լարված գործունեությանը, գերհոգնածությանը կամ գերլարվածությանը հետևող ցավեր, հոդերի կամ ոսկրերի միկրովնասվածքներ,
• ոտքերը խիստ քիչ օգտագործելուց պատճառված թմրածություն, ծակծկոցներ կամ մկանային կարկամություն
• ոտքերի վրա վերքեր կամ խոցեր, ինչպես նաև դրանց վարակային բարդություններ
• մաշկային հիվանդություններ, երբ ախտահարվում է ոտքերն ընդգրկող մաշկը
• ոտքերի արյունատար անոթների և արյան շրջանառության հետ կապված խնդիրներ, օրինակ՝ մակարդուկներ և ոտքերի իշեմիկ ցավեր
• գոտկատեղից «տեղափոխված» ցավեր, օրինակ՝ իշիաս և նյարդացավեր
• նյարդերի ախտահարմամբ պայմանավորված ցավեր, օրինակ՝ դիաբետիկ նեյրոպաթիա:

Ոտքերերի ցավերով կարող են ընթանալ նաև տարբեր քրոնիկ հիվանդություններ, օրինակ՝ ռևմատոիդ արթրիտ և պոդագրա:

Բուժում

Ձեր ոտքի ցավով կարող են զբաղվել տարբեր բժիշկներ՝ պոդիատրիստ, անոթաբան, ֆիզիոթերապևտ և այլն:

Բուժման հնարավոր տարբերակներից են՝

• հանգիստ պայմաններ, անշարժացում կամ վարժանքներ
• տաք կամ սառը միջոցներ
• ֆիզիոթերապիա
• երբեմն՝ հակաբիոտիկներ կամ հակաբորբոքային դեղեր, քսուքներ
• հազվադեպ՝ վիրահատություն:

Ինքնօգնություն

Ոտքի ցավերի մեծ մասը որևէ լուրջ պատճառ չունի և կարող է մեղմացվել տնային պայմաններում: Նման դեպքերում դուք կարող եք՝

• խուսափել կանգնած վիճակներից, առավել ևս՝ ծանրություն կրելուց
• խուսափել բարձրակրունկ կոշիկներից
• ձեր ոտքերին որոշ ժամանակ հանգստություն տալ
• ոտքերին բարձր դիրք տալ
• ոտքի ցավոտ շրջանին դնել բարակ սավանով փաթաթած սառցեպարկ և պահել շուրջ 20 րոպե (եթե նման միջոցով ցավերը մեղանում են, ապա կարող եք կրկնել 2-3 ժամը մեկ). սառեցնող մեթոդը խիստ օգտակար է հատկապես վնասվածքներ ստանալիս
• օգտագործել սեղմող վիրակապ կամ ճնշող գուլպա
• բժշկի խորհրդով խմել սովորական ցավազրկողներ (օրինակ՝ Ացետամինոֆեն) կամ հակաբորբոքային հաբեր (օրինակ՝ Իբուպրոֆեն):

Եթե ունեք մկանային ձգվածություն, ապա թուլացնող մերսումը կարող է օգնել:

Հաճախ մկանային ծակծկոցները և թմրածության զգացողությունը մեղմանում են ոտքի կամ ոտնաթաթի մի շարք պտտողական կամ այլ շարժումներից հետո:

Ընդհանուր առողջության մասին հոգ տանելն իր հերթին կարող է օգնել ոտքերում առկա ցավերի կամ անհարմարավետության զգացման (դիսկոմֆորտ) մեղմացմանը: Օրինակներից են՝ բավարար քունը, բավարար քանակի ջուր ընդունելը, կանոնավոր վարժանքները, ծխախոտից հրաժարվելը և առողջ քաշ պահպանելը: