Ուղիղաղիքային կամ հետանցքից արյունահոսությունն այն վիճակն է, երբ կղանքում նկատում եք արյուն կամ հետանցքից արյունահոսություն։
Նման իրավիճակներում արյունը ձեր օրգանիզմից դուրս է գալիս հետանցքով, ուստի արյունահոսության այս ձևերն անվանում են նաև հետանցք-ուղիղաղիքային։
Ուղիղաղիքային արյունահոսության պատճառները
Ուղիղաղիքային արյունահոսությունն ունի տարբեր պատճառներ։ Դրանցից ամենահաճախ հանդիպողներն են՝
- փորկապություն
- թութք (հեմոռոյ)
- հետանցքի ճաք կամ խուղակ՝ հետանցքի և մաշկի միջև փոքր խողովակի առաջացում
- հետանցքի կամ ուղիղաղիքային վնասվածք, օրինակ՝ դժբախտ պատահար, սեռական ոտնձգություն կամ ինքնավնասում
- աղիքային վարակներ և գաստրոէնտերիտներ
- աղիքային հիվանդություններ, օրինակ՝ պոլիպներ, դիվերտիկուլ, աղիների քաղցկեղ, Կրոնի հիվանդություն կամ խոցային կոլիտ
- հետանցքային (անալ) սեռական հարաբերության ժամանակ ուղիղ աղիք ներթափանցած սեռական ճանապարհով փոխանցվող վարակ
- պեպտիկ խոց (ստամոքսի կամ տասներկումատնյա աղու)։
Ուղիղաղիքային արյունահոսության ախտանիշները
Ինչպես հուշում է անվանումը, այս վիճակի գլխավոր նշանը հետանցք-ուղիղաղիքային արյունահոսությունն է կամ կղանքում արյան հայտնվելը։
Արյան գույնը կարող է հուշել, թե ստամոքս-աղիքային խողովակի որ շրջանում է ծագել արյունահոսությունը։
- Թարմ և բաց կարմիր գույնի արյունահոսությունը վկայում է աղիքների ստորին՝ վերջնային և հետանցքին մոտ շրջաններում սկսված արյունահոսության մասին՝ թութք, հետանցքի ճաք և տեղային այլ խնդիրներ։
- Թարմ կամ մուգ կարմիր գույնի և կղանքի հետ խառնված արյունահոսությունն ավելի հաճախ վկայում է հաստաղիքային ծագման մասին՝ առաջացած հաստ աղիներում տեղակայված պոլիպներից, աղիքի պատի այլ գերաճերից կամ վնասումից (օրինակ՝ հաստաղիքային քաղցկեղներ)։
- Սևացած ու մազութանման կղանքը կարող է վկայել մարսողական ուղու վերին հատվածներում սկսված արյունահոսության մասին, օրինակ՝ պեպտիկ խոցային արյունահոսություններ։
Ե՞րբ դիմել բժշկին
Ուղիղաղիքային արյունահոսությունը կարող է լինել աննշան կամ մեղմ, սակայն կարող է դառնալ նաև առատ և կյանքին սպառնացող։
Եթե ուղիղաղիքային արյունահոսությունը թույլ է, ինքնուրույն անհետացող կամ կղանքում արյունն աննշան է, միևնույն է, դրանց հիմքում կարող են ընկած լինել լուրջ կամ ծանր հիվանդություններ, ուստի պետք է բոլոր դեպքերում տեղեկացնել ձեր բժշկին։
Ուղիղաղիքային արյունահոսությունը նաև կարող է լինել բավականին առատ և ուղեկցվել արյան սուր պակասին՝ անեմիայն բնորոշ այլ նշաններով, ինչպիսիք են ընդհանուր թուլությունւ, սրտխառնոցը, գլխապտույտը կամ ուշագնացությունը։ Նման իրավիճակներում պետք է անհապաղ զանգել 1-03 և կանչել շտապ օգնություն կամ այցելել մոտակա անհետաձգելի կամ վիրաբուժական բաժանմունք։
Հոդվածը հրապարակվել է՝ 19-05-2018
Վերջին վերանայում՝ 07-04-2024