Ձեր օրգանների և հյուսվածքների մշտական աճի, առողջ վիճակի պահպանման ու վերականգնման համար անհրաժեշտ սննդանյութերը ստանում եք սննդով։
Դրանցից մեկը վիտամին B12-ն է, որի անբավարարությունը կարող է բերել լուրջ առողջական հետևանքների։
Վիտամին B12-ն անհրաժեշտ է ինչպես արյան կարմիր բջիջների (էրիթրոցիտներ) առաջացման, այնպես էլ կենտրոնական նյարդային համակարգի նորմալ գործունեության համար։ Սա նշանակում է, որ վիտամին B12-ի դեֆիցիտն առաջին հերթին անդրադառնում է այս երկու ոլորտների վրա։
Վիտամին B12-ի դեֆիցիտ կարող է առաջանալ, եթե սննդակարգում բացակայում են վիտամինով հարուստ սննդամթերքները (օրինակ՝ բուսակերների մոտ): Սակայն, ավելի հաճախ B12-ի պակասի պատճառն աղիներից այս վիտամինի ներծծման խանգարումն է։
Նման դեպքերում բժիշկը կարող է նշանակել արյան մեջ վիտամին B12-ի թեստ, որը սովորաբար նշանակվում է ֆոլաթթվի թեստի հետ։
Վիտամին B12-ի անբավարարությունը կարող է ուղեկցվել հետևյալ ախտանիշներով՝
- գլխապտույտ
- սրտազարկի հաճախացում (տախիկարդիա)
- հեշտությամբ արյունազեղումների կամ արյունահոսության առաջացում
- քաշի կորուստ
- աղիների գործունեության խանգարումներ
- լեզվի վրա վերքերի կամ խոցերի առաջացում։
Եթե ձեր արյան թեստով վիտամին B12-ի դեֆիցիտը հաստատվում է, ձեր բժիշկը խորհուրդ կտա սննդակարգի փոփոխություններ և վիտամին B12 պարունակող դեղեր (հաբեր կամ ներարկման լուծույթներ):
Հոդվածը հրապարակվել է՝ 25-05-2019
Վերջին վերանայում՝ 07-04-2024