Ի՞նչ է խոլեսթերինը

3 րոպե

Խոլեսթերինը (խոլեսթերոլ) ճարպային նյութ է, որն արտադրվում է ձեր օրգանիզմում և ստացվում սննդով:

Խոլեսթերինը ձեր առողջության համար անփոխարինելի նյութ է, սակայն մեծ քանակները կարող են վնասել արյունատար անոթների պատը և մեծացնել սրտանոթային հիվանդությունների ռիսկը:

Ինչո՞ւ է խոլեսթերինն անփոխարինելի

Խոլեսթերինի որոշ քանակներ անհրաժեշտ են, որ ձեր օրգանիզմը նորմալ գործի: Օրինակ, խոլեսթերինը մտնում է բջջաթաղանթների կառուցվածքի մեջ և մասնակցում է որոշ հորմոնների արտադրությանը:

Խոլեսթերինի տեսակները

Ձեր օրգանիզմի խոլեսթերինի շուրջ 75%-ն արտադրվում է լյարդի կողմից, իսկ մնացած 25%-ը ստանում եք սննդով:

Խոլեսթերինն արյան մեջ տեղափոխվում է լիպոպրոտեիդներով, որոնց երկու հիմնական տեսակներն են բարձր խտության (ԲԽԼ) և ցածր խտության լիպոպրոտեիդները (ՑԽԼ): Ձեր բժիշկը նաև կարող է առաջարկել տրիգլիցերիդի (եռգլիցերիդ) թեստ:

• ԲԽԼ-ն հայտնի է որպես «լավ» խոլեսթերին, քանի որ այն խոլեսթերինը տեղափոխում է ձեր զարկերակների պատից դեպի լյարդ՝ պահեստավորման:
• ՑԽԼ-ն հայտնի է նաև որպես «վատ» խոլեսթերին, որովհետև իր խոլեսթերինը թողնում է զարկերակների պատի վրա:
• Տրիգլիցերիդը նույնպես արյան ճարպի մի տեսակ է, որն իր հերթին կարող է բարձրացնել սրտանոթային հիվանդությունների ռիսկը:

Բժիշկներն այս երեք թեստերը միասին անվանում են արյան լիպիդային պրոֆիլ: Արյան լիպիդային պրոֆիլի թեստն օգնում է բժշկին, որ գնահատի ձեզ մոտ սրտային հիվանդության, ներառյալ՝ սրտամկանի ինֆարկտի և ինսուլտի ռիսկերը: Բժիշկը նաև հաշվի է առնում այլ ռիսկի գործոններ, ինչպիսք են՝ բարձր արյան ճնշում, ավելորդ կամ գիրություն, 2-րդ տիպի դիաբետ և ծխախոտի օգտագործում:

Իմացե՛ք ավելին արյան լիպիդային պրոֆիլի մասին:

Ինչո՞ւ է բարձր խոլեսթերինը վատ ձեր առողջության համար

Թեև խոլեսթերինի որոշ քանակներ անփոխարինելի են ձեր օրգանիզմի առողջության համար, նույն այդ խոլեսթերինի բարձր քանակները կարող են առաջացնել առողջական խնդիրներ: Այսպես, ՑԽԼ խոլեսթերինի ավելցուկային քանակները կուտակվում են անոթի պատի վրա՝ առաջացնելով վահանիկներ, որոնք արյան սահուն հոսքի համար դառնում են խոչընդոտ (աթերոսկլերոզ) կամ կարող են նպաստել արյան մակարդուկի առաջացմանը (թրոմբ):

Խոլեսթերինի նվազեցումը և բարվոք առողջության պահպանումը

Եթե ձեր արյան խոլեսթերինը բարձր է, դուք կարող եք նվազեցնել այն տարբեր ճանապարհներով:

Օրինակ, դուք կարող եք կրճատել սննդով ընդունվող հագեցած ճարպերի քանակը՝ ձեր սննդակարդը դարձնելով առողջ: Հագեցած ճարպերով հարուստ մթերքներից են՝

• տորթեր և թխվածքներ
• ճարպոտ միս
• կարագ և բարձր յուղային կաթնամթերքներ
• կոկոսի կամ արմավի յուղ պարունակող մթերքներ:

Ի լրումն, դուք կարող եք նպաստել խոլեսթերինի մակարդակի նորմալացմանը, եթե ձեր սննդակարգում ավելացնեք բջջանքով (բջջանյութով) հարուստ մրգեր և բանջարեղեններ:

Ֆիզիկական ակտիվության բարձրացումը նույնպես կօգնի, որ կարգավորեք ձեր բարձր խոլեսթերինը: Լավագույն տարբերակը ֆիզիկական ակտիվությունն առողջ սննդակարգի հետ զուգակցելն է:

Ապրելակերպի առողջացման միջոցով ձեր խոլեսթերինի կարգավորման ոչ բավարար արդյունքների դեպքում բժիշկը կարող է նշանակել խոլեսթերինը նվազեցնող որոշ դեղեր: Հիշեք, որ դեղամիջոցները ոչ թե փոխարինում են առողջ ապրելակերպի միջոցառումներին, այլ լրացնում են դրանք: