Ալբումին - Սուբստրատներ

Միջազգային անվանում (հապավում). Albumin (ALB)

Նկարագրություն

Ալբումինը (ALB) արյան պլազմայի հիմնական սպիտակուցն է:

Ալբումինն արտադրվում է լյարդում: Հարաբերական մոլեկուլյար զանգվածը 65000 Da (Դալտոն) է, իսկ կիսաքայքայման պարբերությունը՝ 18-20 օր:

Ալբումինը պահպանում է արյան պլազմայի կոլոիդ-օսմոտիկ (օնկոտիկ) ճնշումը, հետևաբար՝ շրջանառող արյան ծավալը: Հանդիսանում է արյան սպիտակուցների գլխավոր պահուստը և երկարատև քաղցի պայմաններում ծախսվում է առաջին հերթին:

Ալբումինն իրականացնում է տեղափոխման գործառույթ՝ կապելով ու տեղափոխելով բիլիռուբինը, լեղաթթուները, մետաղների իոնները (կալցիում), ազատ ճարպաթթուները և արտաքինից ստացվող դեղամիջոցները, ինչպիսիք են հակաբիոտիկները, կորտիկոստերոիդները կամ սալիցիլատները: Ալբումինի մակարդակը քիչ ցածր է վաղ տարիքի երեխաների, հղի կանանց (հատկապես հղիության երրորդ եռամսյակում), կաթնատվության ընթացքում, ինչպես նաև ծխողների մոտ:

Արյան ցածր ալբումինը (հիպոալբումինեմիա) առաջ է բերում արյան ընդհանուր կալցիումի (Ca-T) մակարդակի նվազեցում` ի հաշիվ ալբումինի հետ կապված կալցիումի ֆիզիոլոգիական ոչ ակտիվ մասի, թեև կալցիումի պակասը կլինիկորեն չի դրսևորվում: Հիպոալբումինեմիայի ժամանակ կարող է ուժեղանալ այս սպիտակուցի հետ կապվող դեղամիջոցների ազդեցությունը, որի հետևանքով դրանց սովորական դեղաչափերը կարող են դրսևորել թունավոր (տոքսիկ) ազդեցություններ:

Ցուցումներ

• սուր և քրոնիկ վարակներ
• կոլագենոզներ
• լյարդային հիվանդություն
• երիկամային հիվանդություն
• օնկոլոգիական հիվանդություններ
• սնուցման խանգարումներ
• ջերմային այրվածքներ

Կենսանմուշ

ALB թեսթի համար հանձնվող կենսանմուշն է՝ երակային արյուն։

Կենսանմուշի հանձնում

Արյունը պետք է հանձնել առավոտյան ժամերին, ժամը 8-11-ի սահմաններում, քաղցած վիճակում (ցանկալի է սննդի վերջին ընդունումը ոչ պակաս, քան 8 ժամ և ոչ ավելի, քան 14 ժամ առաջ): Ջրի ընդունումը՝ սովորական ռեժիմով: Նախորդ օրը պետք է խուսափել սննդային ծանրաբեռնվածությունից:

Չափման միավորներ

Միջազգային չափման միավոր (SI համակարգ)

գ/լ (գրամ/լիտր)

Այլընտրանքային չափման միավոր

գ/դլ (գրամ/դեցիլիտր)

Միավորների փոխակերպում

գ/դլ х 10 = գ/լ

Նորմալ (ռեֆերենս) միջակայքեր

Համընդհանուր օգտագործվող միջակայքեր

• Չափահասներ` (35‑52) գ/լ
• Երեխաներ 14-18 տ. (32‑45) գ/լ
• Երեխաներ < 14 տ. (38‑54) գ/լ

Այլընտրանքային միջակայքեր

Արդյունքների մեկնաբանություն

ALB-ի մակարդակի բարձրացում (հիպերալբումինեմիա)

• ջրազրկում (դեհիդրատացիա) և արյան խտացում (ծանր լուծ, խոլերա, անզուսպ փսխումներ աղիքային անանցանելիության ժամանակ, տարածուն այրվածքներ)

ALB-ի մակարդակի նվազեցում (հիպոալբումինեմիա)

• Լյարդում ալբումինի սինթեզի ընկճում
  • քրոնիկ լյարդային հիվանդություն (հեպատիտներ, ցիռոզ, ատրոֆիա, կարցինոմա)
• Սննդի միջոցով անբավարար մուտք օրգանիզմ
  • սովահարություն, կախեքսիա, սպիտակուցներով կամ ոչ հավասարակշռված ամինաթթուներով աղքատ սննդակարգ
  • մալաբսորբցիայի համախտանիշ` գաստրոէնտերոպաթիաներ և ստամոքսաղիքային այլ հիվանդություններ
• Օրգանիզմի սպիտակուցների կորուստ
  • քրոնիկ երիկամային հիվանդություն (նեֆրոտիկ համախտանիշ, դիաբետիկ նեֆրոպաթիա)
  • տարածուն ջերմային այրվածքներ
  • հյուսվածքային վնասվածքներ
  • արյունահոսություններից և արյան փոխարինիչների ներմուծումից հետո
  • էքսուդատների և տրանսուդատների առաջացում
• Ալբումինների ինտենսիվացած կատաբոլիզմ
  • տենդային վիճակներ
  • սեպսիս, վարակիչ հիվանդություններ
  • գերակտիվ վահանաձև գեղձ (թիրեոտոքսիկոզ)
  • չարորակ նորագոյացություններ
  • ռևմատիկ հիվանդություններ
  • հիպերհիդրատացիա (շրջանառող արյան ծավալի մեծացում)
  • ժառանգական դեֆեկտներ (անալբումինեմիա)
  • կանգային սրտային անբավարարություն
  • որոշ դեղերի ընդունում՝ էստրոգեններ, հակաբեղմնավորիչ հաբեր, ամիոդարոն, ստերոիդ հորմոններ (մեծ դեղաչափերով)