Էոզինոֆիլներ - Կլինիկական հետազոտություններԱրյան ընդհանուր քննություն

Միջազգային անվանում (հապավում). Eosinophils (EOS)

Նկարագրություն

Էոզինոֆիլները (EOS) հատվածավորված կորիզով և միատարր գրանուլաներով լցված ցիտոպլազմայով արյան սպիտակ բջիջներ կամ լեյկոցիտներ են:

Էոզինո‎ֆիլները կամ ացիդոֆիլները 10-15 մկմ տրամագծով ձվաձև լեյկոցիտներ են, որոնց կյանքի տևողությունը կազմում է 8-12 օր:/p>

Էոզինոֆիլները նեյտրոֆիլների պես ունեն քեմոտաքսիսի և ֆագոցիտոզի ունակություններ, սակայն առաջինների հիմնական դերը մակաբույծների դեմ պայքարն է և ալերգիկ ռեակցիաների կարգավորումը: Էոզինոֆիլները ‎ֆագոցիտում են հատկապես գնդաձև բակտերիաները:

Արյան մեջ էոզինո‎ֆիլների քանակը շատանում է (էոզինոֆիլիա) ալերգիկ ռեակցիաների, ճիճվային վարակների և աուտոսոմային հիվանդությունների դեպքում: Արյան մեկ միկրոլիտրում էոզինոֆիլների թվաքանակի բարձրացումը 1500-ից ավելի ցուցանիշների և բարձր մակարդակի վրա երկարատև ժամանակի ընթացքում պահպանումը կարող է առաջացնել ներքին օրգանների վնասում (էոզինոֆիլային ինֆիլտրացիա): էոզինո‎ֆիլների քանակի նվազեցումը (էոզինոպենիա) այս բջիջների բացարձակ քանակության կրճատումն է 1 միկրոլիտրում 200 և ավելի ցածր ցուցանիշների:

Ցուցումներ

• պլանային կանխարգելիչ հետազոտություն
• հոսպիտալացմանը նախորդող հետազոտություն
• վարակիչ, բորբոքային և արյունաբանական հիվանդությունների ախտորոշում
• հիվանդության ընթացքի կամ բուժման արդյունավետության հսկողություն

Կենսանմուշ

EOS թեսթի համար հանձնվող կենսանմուշն է՝ երակային արյուն։

Կենսանմուշի հանձնում

Կենսանմուշը պետք է հանձնել առավոտյան ժամերին, քաղցած վիճակում: Սննդի վերջին ընդունումը՝ ոչ պակաս, քան 8 ժամ, ցանկալի է՝ 12 ժամ առաջ: Պետք է բացառել հյութերը, թեյը, սուրճը (հատկապես՝ շաքարով): Կարելի է ընդունել ջուր:

Հնարավորության սահմաններում հետազոտության նախորդ օրը պետք է խուսափել ֆիզիկական և հուզական ծանրաբեռնվածություններից:

Չափման միավորներ

Միջազգային չափման միավոր (SI համակարգ)

• բացարձակ թիվ (EOS#)՝ x 10⁹ բջիջ/լ (միլիարդ հատ 1 լիտրում)
• տոկոս (ֆրակցիա) (EOS%)՝ լեյկոցիտների մեջ տոկոսը (%)

Նորմալ (ռեֆերենս) միջակայքեր

Համընդհանուր օգտագործվող միջակայքեր

Չափահասներ

• էոզինոֆիլների բացարձակ քանակ (EOS#)՝ 0.04-0.4 x 10⁹/լ
• էոզինոֆիլների ֆրակցիա (EOS%)՝ 0.0-6.0 %

Արդյունքների մեկնաբանություն

EOS-ի թվաքանակի բարձրացում (էոզինոֆիլիա)

• ալերգիկ վիճակներ, այդ թվում՝ դեղորայքային ալերգիաներ
• մաշկային հիվանդություններ (դերմատիտ, էկզեմա)
• մակաբույծային ինվազիաներ
• որոշ վարակային հիվանդությունների սուր փուլ (քութեշ, ջրծաղիկ, տուբերկուլոզ, վարակային մոնոնուկլեոզ, գոնորեա)
• համակարգային բորբոքային հիվանդություններ
• թոքային հիվանություններ՝ սարկոիդոզ, թոքային էոզինոֆիլային պնևմոնիա, Լանգերհանսյան բջիջներից հիստիոցիտոզ, էոզինոֆիլային պլևրիտ, թոքային էոզինոֆիլային ինֆիլտրատ (Լեֆլերի հիվանդություն)
• օնկոհեմատոլոգիական հիվանդություններ
• չարորակ նորագոյացություններ

EOS-ի թվաքանակի նվազեցում (էոզինոպենիա)

• բորբոքային պրոցեսի սկզբնական փուլ
• ծանր թարախային վարակներ
• շոկային վիճակներ
• ծանր մետաղներով թունավորումներ