Միջազգային անվանում (հապավում). Monocytes (MONO)
Նկարագրություն
Մոնոցիտները (MONO) չհատվածավորված ոլոռանման կորիզով խոշոր արյան սպիտակ բջիջներ կամ լեյկոցիտներ են, որոնք ապահովում են օրգանիզմի ոչ սպեցիֆիկ բջջային իմունիտետը:
Մոնոցիտները կազմում են շրջանառող արյան լեյկոցիտների 2-10 %-ը, ունեն 12-18 մկմ տրամագիծ, արյան մեջ շրջանառում են 70 ժամ, ապա գաղթում հյուսվածքներ, որտեղ ապրում են մինչև 60 օր՝ պահպանելով արյան հուն վերադառնալու ունակությունը: Որոշ ենթատեսակներ կարող են ապրել մինչև մի քանի տարի:
Հյուսվածքներում մոնոցիտները հասունանում և վերափոխվում են հյուսվածքային մակրոֆագերի, որոնց բնորոշ է մեծ քանակով լիզոսոմների առկայությունը և կեղծ ոտիկների առաջացումը:
Մոնոցիտների գործառույթը նման է գրանուլոցիտների ֆունկցիաներին, սակայն դրանք օժտված են ավելի բարձր ֆագոցիտար ակտիվությամբ (հատկապես մանէների, սնկիկների և մակրոմոլեկուլների նկատմամբ): Բորբոքային օջախում մակրոֆագները ճանաչում, կլանում և քայքայում են մանրէները, մահացած լեյկոցիտները, բորբոքված հյուսվածքի վնասված բջիջները՝ նախապատրաստելով վնասված հյուսվածքների ռեգեներացիան:
Մոնոցիտները կատարում են բազմաթիվ գործառույթներ: Ի հաշիվ ֆագոցիտային և բակտերիասպան հատկությունների՝ համարվում են օրգանիզմի ոչ սպեցիֆիկ ռեզիստենտության բջջային գործոններ: Իրականացնելով պաշտպանական գործառույթ՝ մոնոցիտները կանխում են ախտածին մանրէների զարգացումը, կլանում և քայքայում ախտահարված էրիթրոցիտները, ծերեցած բջիջները, բնափոխված սպիտակուցները: Մեկ մոնոցիտը կլանում է 100 մանրէ, որի համար կոչվում է մակրոֆագ:
Մոնոցիտոզը մոնոցիտների բացարձակ թվի բարձրացումն է՝ ավելի քան 1000՝ մեկ միկրոլիտրում:
Լաբորատոր բաժնի հովանավոր
Այցելեք Յունիմեդ բժշկական կենտրոն ճշտգրիտ ախտորոշում ստանալու համար:
Ցուցումներ
- պլանային կանխարգելիչ հետազոտություն
- հոսպիտալացմանը նախորդող հետազոտություն
- վարակիչ, բորբոքային և արյունաբանական հիվանդությունների ախտորոշում
- հիվանդության ընթացքի կամ բուժման արդյունավետության հսկողություն
Կենսանմուշ
MONO թեսթի համար հանձնվող կենսանմուշն է՝ երակային արյուն։
Կենսանմուշի հանձնում
Կենսանմուշը պետք է հանձնել առավոտյան ժամերին, քաղցած վիճակում: Սննդի վերջին ընդունումը՝ ոչ պակաս, քան 8 ժամ, ցանկալի է՝ 12 ժամ առաջ: Պետք է բացառել հյութերը, թեյը, սուրճը (հատկապես՝ շաքարով): Կարելի է ընդունել ջուր:
Հնարավորության սահմաններում հետազոտության նախորդ օրը պետք է խուսափել ֆիզիկական և հուզական ծանրաբեռնվածություններից:
Լրացուցիչ տեղեկատվություն և օգնություն
Չափման միավորներ
Միջազգային չափման միավոր (SI համակարգ)
- բացարձակ թիվ (MONO#)՝ x 109 բջիջ/լ (միլիարդ հատ 1 լիտրում)
- տոկոս (ֆրակցիա) (MONO%)՝ լեյկոցիտների մեջ տոկոսը (%)
Նորմալ (ռեֆերենս) միջակայքեր
Համընդհանուր օգտագործման միջակայքեր (չափահասներ)
- Մոնոցիտների բացարձակ քանակ (MONO#)՝ 0,2-1,0 x 109/լ
- Մոնոցիտների ֆրակցիա (MONO%)՝ 3-10 %
Այլընտրանքային միջակայքեր
| Տարիք | MONO% |
|---|---|
| 1-15 օր. | 5 - 15 |
| 15 օր.-12 ամս. | 4 - 10 |
| 12 ամս. - 2 տ. | 3 - 10 |
| 2-15 տ. | 3 - 9 |
| ≥ 15 տ. | 3-11 |
Արդյունքների մեկնաբանություն
MONO-ի թվաքանակի բարձրացում (մոնոցիտոզ)
- սուր և քրոնիկ վարակային և բորբոքային հիվանդություններ
- վիճակ տարած վարակային հիվանդությունից հետո
- աուտոիմուն հիվանդություններ
- չարորակ նորագոյացություններ
- օնկոհեմատոլոգիական հիվանդություններ
- թունավորում տետրաքլորէթանով, ֆոսֆորով
MONO-ի թվաքանակի նվազեցում (մոնոպենիա)
- թարախածին վարակներ
- ապլաստիկ անեմիաներ
- շոկային վիճակներ
- սակավարյունություններ (անեմիա)
- օնկոհեմատոլոգիական հիվանդություններ
- որոշ դեղերի ընդունում՝ գլյուկոկորտիկոիդներ, ցիտոստատիկներ և այլն
Վարվեք այս կերպ
Լաբորատոր թեստի արդյունքների մեկնաբանումը վստահեք ձեր բժշկին: Նա ձեզ կբացատրի յուրաքանչյուր ցուցանիշը և դրա շեղման հնարավոր պատճառը:
Մի՛ փորձեք
Ինքնուրույն վերլուծել ձեր պատասխանները և, առավել ևս, ինքնուրույն փոխել ձեր դեղամիջոցները կամ դրանց դեղաչափերը:
Հոդվածը հրապարակվել է՝ 14-04-2018
Վերջին վերանայում՝ 08-06-2023