Կիստաներ -

Կիստան ձեր մարմնի ներսում՝ հյուսվածքներում կամ օրգաններում առաջացող խորշ է, խոռոչ կամ պարկ, որը լցված է հեղուկով, կիսահեղուկ կամ կիսապինդ նյութով կամ օդով:

Ի՞նչ է կիստան

Կիստան պատեր և պարունակություն ունեցող ախտաբանական խորշ է կամ պարկ: Կիստայի չափը, պարունակությունն ու պատի կառուցվածքը տարբեր են՝ կախված առաջացման պատճառից և ժամանակից, տեղակայումից և այլ գործոններից:

Կիստաները տարածված են և կարող են ձևավորվել մարմնի ցանկացած շրջանում: Դրանք կարող են լինել աչքի համար անտեսանելի չափերի կամ աճել՝ հասնելով թենիսի գնդակի և ավելի մեծ չափերի (հսկա կիստաներ):

Կիստաները տարբերվում են թարախակույտերից (աբսցես) կամ ֆուրունկուլներից (չիբան), որոնք լցված են թարախով:

Բազմաթիվ կիստաներ քաղցկեղային չեն, թեև կիստա կարող է առաջանալ նաև որոշ քաղցկեղների ժամանակ:

Կիստաների տեսակները

Կան կիստաների հարյուրավոր տեսակներ: Դրանց տարբեր տեսակները ձևավորվում են մարմնի տարբեր շրջաններում:

Կիստաների ամենահաճախ հանդիպող տեսակներից են՝

• ակնեի կիստաներ
• բարթոլինյան կիստաներ (հեշտոցի վրա)
• կրծքագեղձի կիստաներ
• խալազիոնային կիստաներ (կոպերի վրա)
• ձվարանային կիստաներ
• ենթաստամոքսային գեղձի (պանկրեատիկ) կիստաներ
• պոչուկային (պիլոնիդալ) կիստաներ (պոչուկային ոսկրի մոտ):

Կիստաները նաև լինում են բնածին և ձեռքբերովի, երբ առաջանում են կյանքի ընթացքում որևէ հյուսվածքի կամ օրգանի գործունեության խանգարման պատաճառով:

Ի՞նչ պատճառով են առաջանում կիստաները

Կիստաներն առաջանում են խցանման պատճառով, որը բերում է հեղուկի կամ օդի կուտակման: Այսպիսի խցանումը կարող է լինել վարակի, ժառանգական հիվանդությունների, մակաբույծների կամ ուռուցքների պատճառով: Որոշ մարդկանց մոտ կիստաներ կարող են առաջանալ մարմնի մազերի կամ ականջօղերի (պիրսինգ) շուրջը:

Ըստ ձևավորման մեխանիզմի տարբերում են կիստաների հետևյալ տեսակները:

• Ռետենցիոն կամ գեղձային կիստաներ. առաջանում են գեղձերում սեկրեցիայի արտահոսքի դժվարացման կամ լրիվ դադարեցման հետևանքով: Օրինակներից են՝ ճարպագեղձերի, թքագեղձերի, կաթնագեղձերի, ձվարաների ֆոլիկուլյար, ենթաստամոքսային գեղձի, շագանակագեղձի և այլ կիստաներ:
• Ռամոլիկ կիստաներ. առաջանում են մեռուկացած հյուսվածքների փափկացման, նոսրացման և ներծծման հետևանքով, երբ առկա է արյունազեղում, բորբոքում կամ մեռուկացում: Օրինակներից են՝ ձվարանների դեղին մարմնով կիստաներ, ատամի, ոսկրային կիստաներ, ինչպես նաև գլխուղեղում և ողնուղեղում առաջացած կիստաներ:
• Մակաբուծային կիստաներ. առաջանում են թրթուրի փուլում գտնվող երիզորդներից: Օրինակներից են՝ էխինոկոկի կամ խոզի երիզորդի կիստաներ:
• Տրավմատրիկ կիստաներ. առաջանում են էպիթելային հյուսվածքների տեղահանման արդյունքում: Օրինակներից են՝ մատների ֆալանգների և ափերի տրավմատիկ էպիթելային կիստաներ:
• Դիզօնտոգենետիկ կիստաներ. բնածին կիստաներ են, որոնք առաջանում են երբեմն պահպանված սաղմնային ուղիներում և ճաքերում կամ շարժվող հյուսվածքներում՝ սաղմի ձևավորման ընթացքում: Օրինակներից են՝ խռիկավոր ճեղքերում պահպանված կիստաներ, ստամոքս-աղիքային խողովակի մնացորդներից կիստաներ, երիկամների, լյարդի, թոքերի և կենտրոնական նյարդային համակարգի կիստաներ և այլն:
• Ուռուցքային կիստաներ. հաճախ ձևավորվում են գեղձային օրգաններում, երբ աճող ուռուցքային հյուսվածքը խախտված նյութափոխանակության և քաղցկեղի զարգացման արդյունքում ձևավորում է խորշեր: Օրինակներից են՝ թքագեղձերի կիստոզ ադենոմա, կիստոզ լինֆանգիոմա, կիստոզ ամելոբլաստոմա և այլն:

Կիստայի ախտանիշները

Գանգատները և մյուս ախտանիշները կախված են կիստայի տեսակից և տեղակայումից:

Կիստաների մեծ մասը չի դրսևորում որևէ ախտանիշ, թեև դուք կարող եք տեղյակ լինել ուռուցքանման գոյացության առկայության մասին, հատկապես, եթե դրանք ձեր մաշկի տակ են կամ ցավոտ են:

Որոշ կիստաներ առաջացնում են ցավ, հատկապես երբ աճում են և ճնշում հարակից հյուսվածքները կամ նյարդերը:

Ներքին օրգանների կիստաները կարող են առաջացնել տվյալ օրգանին գործունեության խափանմանը հատուկ կամ հարակից հյուսվածքների, անոթների կամ նյարդերի ճնշման ախտանիշներ:

Կիստայի ախտորոշումը

Եթե կարծում եք, որ ունեք կիստա, դիմեք ձեր բժշկին, քանի որ որոշ կիստաներ ունեն բուժման կարիք, իսկ երբեմն կարող են լինել քաղցկեղային ծագման:

Կախված կիստայի տեսակից և տեղակայումից, բժիշկը կարող է ձեզ առաջարկել պատկերման հետազոտություններ, օրինակ՝ որևէ տեսակի ռենտգեն (օրինակ՝ կրծքագեղձերը հետազոտելու համար՝ մամոգրաֆիա) կամ գերձայնային հետազոտություն (սոնոգրաֆիա):

Երբեմն առաջանում է բիոպսիա կատարելու անհրաժեշտություն, երբ մանրադիտակային հետազոտության և կիստայի տեսակը որոշելու համար նմուշառվում է կիստայի պատից փոքր կտոր կամ պարունակությունից փոքր ծավալ:

Կիստայի բուժումները

Բժշկի առաջարկած բուժման տարբերակը կախված է կիստայի տեսակից և տեղակայումից, ինչպես նաև առկա ախտանիշներից, օրինակ՝ ցավոտության կամ անհարմարավետություն: Բազմաթիվ կիստաներ ինքնուրույն կամ աննկատ անհետանում են՝ չպահանջելով որևէ բուժում:

Եթե կիստաներն անհարմարություն են պատճառում, առաջացնում են ցավի զգացում, խախտում են օրգանի գործունեությունը կամ սպառնում են որևէ բարդության, կատարվում է կիստայի մեկուսացված կամ օրգանի հետ (օրգանի մի մասի) վիրահատական հեռացում:

Երիկամների, լյարդի, ենթաստամոքսային գեղձի հեղուկ պարունակությամբ բազմաթիվ կիստաներ կարող են բուժվել պունկցիայի կամ դրենաժի միջոցով՝ գերձայնային հսկողության ներքո:

Որոշ դեպքերում, ինչպես, օրինակ՝ պոլիկիստոզային ձվարանների համախտանիշի ժամանակ, անհրաժեշտ է բուժել կիստան առաջացնող պատճառը:

Եթե մաշկային կիստան վարակվել է, ձեր բժիշկը կարող է նշանակել հակաբիոտիկներ: Մի՛ փորձեք ինքներդ պայթացնել կամ սեղմելով դատարկել նման կիստաները:

Կիստաների մասին լրացուցիչ և օգտակար տեղեկություններ կարող եք հարցնել ձեր բժշկից: